Nekrolog

Nekrolog (yun. nekros – oʻlik, logos – soʻz, nutq) – biron bir shaxsning (odatda, taniqli kishilar, davlat yoki jamoat arboblari, sanʼatkorlar, adiblar va h.) oʻlimi munosabati bilan yozilgan maqola; keyingi vaqtda biron-bir shaxsga yaqin kishisi vafoti munosabati bilan bildirilgan moʻʼjaz taʼziyanomalar ham N. deb yuritilmoqda. Odatda, N.larda vafot etgan shaxsning faoliyati, bu faoliyatning ahamiyati muxtasar yoritiladi. Shu jihati bilan N.lar vaqti kelib qimmatli manba boʻlib qolishi ham mumkin. Mas., jadid nashrlarida I.Gʻasprali vafoti munosabati bilan eʼlon qilingan N.lar uning Turkiston bilan aloqalari haqida maʼlumotlar berishi bilan muhim boʻlsa, Choʻlponning “Ikki yoʻqotish” nomli N.i qoʻqonlik maʼrifatparvarlar – domla Yoʻldosh Mavlaviy bilan shoir Ibrohim Davronlar haqida maʼlumot beradiki, ular davr adabiyoti va tarixini oʻrganishda asqotadi.

Некролог (юн. nekros – ўлик, logos – сўз, нутқ) – бирон бир шахснинг (одатда, таниқли кишилар, давлат ёки жамоат арбоблари, санъаткорлар, адиблар ва ҳ.) ўлими муносабати билан ёзилган мақола; кейинги вақтда бирон-бир шахсга яқин кишиси вафоти муносабати билан билдирилган мўъжаз таъзияномалар ҳам Н. деб юритилмоқда. Одатда, Н.ларда вафот этган шахснинг фаолияти, бу фаолиятнинг аҳамияти мухтасар ёритилади. Шу жиҳати билан Н.лар вақти келиб қимматли манба бўлиб қолиши ҳам мумкин. Мас., жадид нашрларида И.Ғаспрали вафоти муносабати билан эълон қилинган Н.лар унинг Туркистон билан алоқалари ҳақида маълумотлар бериши билан муҳим бўлса, Чўлпоннинг “Икки йўқотиш” номли Н.и қўқонлик маърифатпарварлар – домла Йўлдош Мавлавий билан шоир Иброҳим Давронлар ҳақида маълумот берадики, улар давр адабиёти ва тарихини ўрганишда асқотади.