Sabab

Sabab (ar. سبب – chodirning arqoni) – sokin va mutaharrik harflarning muayyan tartibda birikishidan hosil boʻluvchi ritmik birlik, juzv (q.). Harflarning qay tartibda birikishidan kelib chiqib, S.ning ikki turi farqlanadi: S.i hafif (yoki yengil S.) va S.i saqiyl (yoki ogʻir S.). Bitta mutaharrikka bir sokin harfning qoʻshilishidan S.i hafif hosil boʻladi: “gul”, “koʻz”, “qad” kabi soʻzlar shu vaznga mos. Mas., “gul”: mutaharrik (gu) + sokin (l). Ikkita mutaharrik harfning qoʻshilishidan S.i saqiyl (talaffuzi S.i hafifga nisbatan qiyinroq ekani uchun shunday nomlanadi) hosil boʻladi: “gala”, “sana”, “bila” kabi soʻzlar shu vaznga mos. Mas., “bila”: mutaharrik (bi) + mutaharrik (la).

Сабаб (ар. سبب – чодирнинг арқони) – сокин ва мутаҳаррик ҳарфларнинг муайян тартибда бирикишидан ҳосил бўлувчи ритмик бирлик, жузв (қ.). Ҳарфларнинг қай тартибда бирикишидан келиб чиқиб, С.нинг икки тури фарқланади: С.и ҳафиф (ёки енгил С.) ва С.и сақийл (ёки оғир С.). Битта мутаҳаррикка бир сокин ҳарфнинг қўшилишидан С.и ҳафиф ҳосил бўлади: “гул”, “кўз”, “қад” каби сўзлар шу вазнга мос. Мас., “гул”: мутаҳаррик (гу) + сокин (л). Иккита мутаҳаррик ҳарфнинг қўшилишидан С.и сақийл (талаффузи С.и ҳафифга нисбатан қийинроқ экани учун шундай номланади) ҳосил бўлади: “гала”, “сана”, “била” каби сўзлар шу вазнга мос. Мас., “била”: мутаҳаррик (би) + мутаҳаррик (ла).