Rukn (ar. ركن – ustun) – aruzda juzv (turkiy aruzda hijo)larning muayyan tartibda birikishidan hosil boʻluvchi ritmik boʻlak, juzv bilan bahr orasidagi ritmik birlik. Hozirgi adabiyotshunoslikda R. termini, koʻproq, mazkur maʼnoda qoʻllansa-da, mumtoz aruzshunoslikda u juzv (q.) maʼnosida ham faol ishlatilgan. Aksincha, hozirda R. termini bilan yuritiluvchi tushuncha mumtoz aruzshunoslikda afoyil, tafoyil, ajzo, vazn, arkon (R.ning koʻpligi) kabi istilohlar bilan ham ifodalangan. Aruzda juzvlarning maʼlum tartibda qoʻshilishidan sakkizta afoyil yoki asllar, yaʼni asl R.lar yuzaga keladi:
Fauvlun = vatadi majmuʼ + sababi hafif
Foilun = sababi hafif + vatadi majmuʼ
Mafoiylun = vatadi majmuʼ + sababi hafif + sababi hafif
Foilotun = sababi hafif + vatadi majmuʼ+ sababi hafif
Mustafʼilun = sababi hafif + sababi hafif + vatadi majmuʼ
Mafʼulotu = sababi hafif + sababi hafif + vatadi mafruq
Mafoilatun = vatadi majmuʼ + fosilai sugʻro
Mutafoilun = fosilai sugʻro + vatadi majmuʼ
Mazkur sakkiz asl R.ning takroridan bahrlar (q.) hosil boʻladi. Asllarning zihofga (q.) uchrashidan tarmoq (yoki farʼiy, furuʼ) R.lar hosil boʻladi.
Рукн (ар. ركن – устун) – арузда жузв (туркий арузда ҳижо)ларнинг муайян тартибда бирикишидан ҳосил бўлувчи ритмик бўлак, жузв билан баҳр орасидаги ритмик бирлик. Ҳозирги адабиётшуносликда Р. термини, кўпроқ, мазкур маънода қўлланса-да, мумтоз арузшуносликда у жузв (қ.) маъносида ҳам фаол ишлатилган. Аксинча, ҳозирда Р. термини билан юритилувчи тушунча мумтоз арузшуносликда афойил, тафойил, ажзо, вазн, аркон (Р.нинг кўплиги) каби истилоҳлар билан ҳам ифодаланган. Арузда жузвларнинг маълум тартибда қўшилишидан саккизта афойил ёки асллар, яъни асл Р.лар юзага келади:
Фаувлун = ватади мажмуъ + сабаби ҳафиф
Фоилун = сабаби ҳафиф + ватади мажмуъ
Мафоийлун = ватади мажмуъ + сабаби ҳафиф + сабаби ҳафиф
Фоилотун = сабаби ҳафиф + ватади мажмуъ+ сабаби ҳафиф
Мустафъилун = сабаби ҳафиф + сабаби ҳафиф + ватади мажмуъ
Мафъулоту = сабаби ҳафиф + сабаби ҳафиф + ватади мафруқ
Мафоилатун = ватади мажмуъ + фосилаи суғро
Мутафоилун = фосилаи суғро + ватади мажмуъ
Мазкур саккиз асл Р.нинг такроридан баҳрлар (қ.) ҳосил бўлади. Аслларнинг зиҳофга (қ.) учрашидан тармоқ (ёки фаръий, фуруъ) Р.лар ҳосил бўлади.
Manba: Dilmurod Quronov, Zokirjon Mamajonov, Mashhura Sheraliyeva. Adabiyotshunoslik lugʻati / f.f.d. D. Quronovning umumiy tahriri ostida. – Toshkent: Akademnashr, 2010. – 400 b.