Adabiy maktab

Adabiy maktab (ruschadan kalka: “literaturnaya shkola”) – adabiy yoʻnalish ichidagi hodisa, muayyan gʻoyaviy-estetik qarashlar, ijodiy prinsiplarni dasturiy tarzda qabul qilgan ijodkorlar guruhi. Mas., fransuz romantizm adabiyotidagi “Parnas” guruhi shunday ijodkorlarni birlashtirgan boʻlib, “parnas”chilarning gʻoyaviy-estetik qarashlari, ijod namunalari “Yangi Parnas” nomi bilan chop etilgan toʻplamlarda oʻz aksini topgan. XX asr boshlarida rus adabiyotida maydonga chiqqan modernistik yoʻnalish ichida simvolizm, akmeizm, futurizm kabi oqimlar, futurizm oqimi ichida esa, mas., kubofuturizm deb yuritiluvchi adabiy maktab boʻlgan. V.Xlebnikov, V.Mayakovskiy singari isteʼdodli ijodkorlarni birlashtirgan kubofuturistlarning “Gileya” guruhi oʻz adabiy-estetik qarashlari, ijodiy prinsiplarini “Jamiyat didiga tarsaki” nomli manifestda eʼlon qilgan.

Адабий мактаб (русчадан калька: “литературная школа”) – адабий йўналиш ичидаги ҳодиса, муайян ғоявий-эстетик қарашлар, ижодий принципларни дастурий тарзда қабул қилган ижодкорлар гуруҳи. Мас., француз романтизм адабиётидаги “Парнас” гуруҳи шундай ижодкорларни бирлаштирган бўлиб, “парнас”чиларнинг ғоявий-эстетик қарашлари, ижод намуналари “Янги Парнас” номи билан чоп этилган тўпламларда ўз аксини топган. ХХ аср бошларида рус адабиётида майдонга чиққан модернистик йўналиш ичида символизм, акмеизм, футуризм каби оқимлар, футуризм оқими ичида эса, мас., кубофутуризм деб юритилувчи адабий мактаб бўлган. В.Хлебников, В.Маяковский сингари истеъдодли ижодкорларни бирлаштирган кубофутуристларнинг “Гилея” гуруҳи ўз адабий-эстетик қарашлари, ижодий принципларини “Жамият дидига тарсаки” номли манифестда эълон қилган.