Antologiya

Antologiya (yun. anthologia – guldasta) – biror milliy adabiyot, davr, adabiy yoʻnalish va sh.k.larga mansubligi jihatidan tanlangan ijodkorlar asarlaridan namunalarni jamlovchi toʻplam. A.lar tuzish anʼanasi qadimgi Yunonistonda boshlangan boʻlib, keyingi davrlarda uning turfa koʻrinishlari paydo boʻlgan. Sharq adabiyotidagi tazkiralar ham mohiyatan A.ga yaqin turadi. Shuningdek, Fitratning “Eng eski turk adabiyoti namunalari” (1927) va “Oʻzbek adabiyoti namunalari” (1928) nomli xrestomatiyalariga ham A. prinsiplari asosida tartib berilgan. XX asr oʻzbek adabiyotida bir qator A.lar tuzilgan. Jumladan, “Oʻzbek yosh shoirlari” (1922), “Oʻzbek poeziyasi antologiyasi”(1949), “Antologiya uzbekskoy poezii” (1950), “Oʻzbek modern sheʼriyati”(2005), “XX asr oʻzbek sheʼriyati antologiyasi”(2007) va b.

Антология (юн. anthologia – гулдаста) – бирор миллий адабиёт, давр, адабий йўналиш ва ш.к.ларга мансублиги жиҳатидан танланган ижодкорлар асарларидан намуналарни жамловчи тўплам. А.лар тузиш анъанаси қадимги Юнонистонда бошланган бўлиб, кейинги даврларда унинг турфа кўринишлари пайдо бўлган. Шарқ адабиётидаги тазкиралар ҳам моҳиятан А.га яқин туради. Шунингдек, Фитратнинг “Энг эски турк адабиёти намуналари” (1927) ва “Ўзбек адабиёти намуналари” (1928) номли хрестоматияларига ҳам А. принциплари асосида тартиб берилган. ХХ аср ўзбек адабиётида бир қатор А.лар тузилган. Жумладан, “Ўзбек ёш шоирлари” (1922), “Ўзбек поэзияси антологияси”(1949), “Антология узбекской поэзии” (1950), “Ўзбек модерн шеърияти”(2005), “ХХ аср ўзбек шеърияти антологияси”(2007) ва б.