Atributsiya

Atributsiya (lot. attribution – nisbat bermoq) – matnshunoslik sohasi oldida turuvchi asosiy ilmiy muammo (vazifa)lardan biri, adabiy asarning muallifi, yozilgan vaqti yoki joyini aniqlash, evristika. Bu muammo turli manbalardan (mas., tazkiralar, tarixiy asarlar, arxiv materiallari, xotiralar va b.) hujjatli dalillar topish; muallifi nomaʼlum asarning gʻoyaviy-badiiy, til va uslub xususiyatlarini shak-shubhasiz nisbat berilayotgan ijodkor qalamiga mansub asar bilan qiyosiy oʻrganish; asarning yozuvi (kotibi, xattotlik maktabi, xat va uning ommalashgan davri), kitobat qilinish xususiyatlari (qogʻoz, siyoh, muqova, bezaklar va b.)ni tadqiq etish kabi yoʻllar bilan hal qilinadi. Shularning barini eʼtiborda tutgan holda kompleks yondashuv asosida amalga oshirilgan A.gina ilmiy sanaladi.

Атрибуция (лот. attribution – нисбат бермоқ) – матншунослик соҳаси олдида турувчи асосий илмий муаммо (вазифа)лардан бири, адабий асарнинг муаллифи, ёзилган вақти ёки жойини аниқлаш, эвристика. Бу муаммо турли манбалардан (мас., тазкиралар, тарихий асарлар, архив материаллари, хотиралар ва б.) ҳужжатли далиллар топиш; муаллифи номаълум асарнинг ғоявий-бадиий, тил ва услуб хусусиятларини шак-шубҳасиз нисбат берилаётган ижодкор қаламига мансуб асар билан қиёсий ўрганиш; асарнинг ёзуви (котиби, хаттотлик мактаби, хат ва унинг оммалашган даври), китобат қилиниш хусусиятлари (қоғоз, сиёҳ, муқова, безаклар ва б.)ни тадқиқ этиш каби йўллар билан ҳал қилинади. Шуларнинг барини эътиборда тутган ҳолда комплекс ёндашув асосида амалга оширилган А.гина илмий саналади.