Gimn

Gimn (yun. hymnos – madhiya) – 1) qadimgi yunon adabiyotida ilohlarni ulugʻlash, maqtash uchun kuylangan qoʻshiq. Yunonlar Apollonni madh etish uchun pean, Dionis madhi uchun difiramb toʻqib kuylashgan. Keyinchalik tarixiy voqealar, qahramonlar madh etiluvchi tantanavor qoʻshiqlar ham G. deb yuritilgan. G.ning ilk namunalari Misr, Mesopotamiya, Hindiston xalqlari adabiyotida uchraydi. G.ga xos xususiyatlar sifatida tantanavorlik, faxr-iftixor, ruhiy koʻtarinkilikning boʻrtib turishi, marosim va tantanalarda koʻpchilik tomonidan ijro etilishi kabilarni koʻrsatish mumkin; 2) mazmunan dasturiy xarakterdagi sheʼr asosidagi tantanavor qoʻshiq, muayyan ijtimoiy harakat, uyushma, muassasa, davlat va sh.k.larning atributlaridan biri, madhiyasi. Mas., Oʻzbekiston Respublikasi Davlat Madhiyasi, “Internatsional”, “Jahon demokratik yoshlari federatsiyasi gimni” va h.

Гимн (юн. hymnos – мадҳия) – 1) қадимги юнон адабиётида илоҳларни улуғлаш, мақташ учун куйланган қўшиқ. Юнонлар Аполлонни мадҳ этиш учун пеан, Дионис мадҳи учун дифирамб тўқиб куйлашган. Кейинчалик тарихий воқеалар, қаҳрамонлар мадҳ этилувчи тантанавор қўшиқлар ҳам Г. деб юритилган. Г.нинг илк намуналари Миср, Месопотамия, Ҳиндистон халқлари адабиётида учрайди. Г.га хос хусусиятлар сифатида тантанаворлик, фахр-ифтихор, руҳий кўтаринкиликнинг бўртиб туриши, маросим ва тантаналарда кўпчилик томонидан ижро этилиши кабиларни кўрсатиш мумкин; 2) мазмунан дастурий характердаги шеър асосидаги тантанавор қўшиқ, муайян ижтимоий ҳаракат, уюшма, муассаса, давлат ва ш.к.ларнинг атрибутларидан бири, мадҳияси. Мас., Ўзбекистон Республикаси Давлат Мадҳияси, “Интернационал”, “Жаҳон демократик ёшлари федерацияси гимни” ва ҳ.