Intermediya

Intermediya (lot. intermedius – oʻrtada joylashgan, ichidagi) – 1) oʻrta asrlar teatrlarida oʻynalayotgan asosiy spektaklning parda oralaridagi tanaffus payti ijro etilgan maishiy mavzudagi kichik hajviy sahna koʻrinishi; 2) estrada sanʼati va televideniyening rivojlanishi bilan bogʻliq holda faollashgan komik xarakterdagi kichik dramaturgik janr, baʼzan miniatyura nomi bilan ham yuritiladi. Oʻzbek adabiyotida S.Ahmad, Alp Jamol kabi ijodkorlarning “Televizion miniatyuralar teatri” uchun yozilgan I.lari xalqimiz orasida shuhrat topgan. Shuningdek, hozirgi vaqtda turli madaniy-maʼrifiy tadbirlarda (koʻriklar, quvnoqlar va zukkolar bahsi va h.) ijro etilayotgan maishiy mavzulardagi sahna koʻrinishlarini ham I. sanash mumkin. Ushbu sahna koʻrinishlarini havaskorlarning (koʻpincha, kollektiv tarzda) oʻzlari yozishi eʼtiborga olinsa, ularni zamonaviy folklor namunasi deyish mumkin.

Интермедия (лот. intermedius – ўртада жойлашган, ичидаги) – 1) ўрта асрлар театрларида ўйналаётган асосий спектаклнинг парда ораларидаги танаффус пайти ижро этилган маиший мавзудаги кичик ҳажвий саҳна кўриниши; 2) эстрада санъати ва телевидениенинг ривожланиши билан боғлиқ ҳолда фаоллашган комик характердаги кичик драматургик жанр, баъзан миниатюра номи билан ҳам юритилади. Ўзбек адабиётида С.Аҳмад, Алп Жамол каби ижодкорларнинг “Телевизион миниатюралар театри” учун ёзилган И.лари халқимиз орасида шуҳрат топган. Шунингдек, ҳозирги вақтда турли маданий-маърифий тадбирларда (кўриклар, қувноқлар ва зукколар баҳси ва ҳ.) ижро этилаётган маиший мавзулардаги саҳна кўринишларини ҳам И. санаш мумкин. Ушбу саҳна кўринишларини ҳаваскорларнинг (кўпинча, коллектив тарзда) ўзлари ёзиши эътиборга олинса, уларни замонавий фольклор намунаси дейиш мумкин.