Jargon

Jargon (fr. jargon – begona, tushunarsiz til) – muayyan ijtimoiy qatlam, kichik guruhga xos “sheva”, umumxalq tilidan farqlanib, asosan, shu “sheva” vakillariga tushunarli boʻlgan unsurlardan tarkib topadi. J., asosan, leksik va frazeologik birliklar hisobiga yuzaga keladi, shuning uchun ham u tilning leksik va frazeologik sathlarida voqe boʻluvchi hodisa sifatida taʼriflanadi. Biroq amalda J. , koʻpincha, bu ikki sath chegarasidan chiqadi, yaʼni butun boshli gap ham J. sanalishi mumkin. Shuning uchun ham terminning kengroq – “sheva” sifatida tushunilishi toʻgʻriroq boʻladi. J. badiiy asarda personajlar nutqini individuallashtirish, muhit koloritini berish maqsadida, asosan, personajlar nutqida qoʻllanadi.

Жаргон (фр. jargon – бегона, тушунарсиз тил) – муайян ижтимоий қатлам, кичик гуруҳга хос “шева”, умумхалқ тилидан фарқланиб, асосан, шу “шева” вакилларига тушунарли бўлган унсурлардан таркиб топади. Ж., асосан, лексик ва фразеологик бирликлар ҳисобига юзага келади, шунинг учун ҳам у тилнинг лексик ва фразеологик сатҳларида воқе бўлувчи ҳодиса сифатида таърифланади. Бироқ амалда Ж. , кўпинча, бу икки сатҳ чегарасидан чиқади, яъни бутун бошли гап ҳам Ж. саналиши мумкин. Шунинг учун ҳам терминнинг кенгроқ – “шева” сифатида тушунилиши тўғрироқ бўлади. Ж. бадиий асарда персонажлар нутқини индивидуаллаштириш, муҳит колоритини бериш мақсадида, асосан, персонажлар нутқида қўлланади.