Koʻrinish – dramatik asarning eng kichik tarkibiy qismi. Odatda, pardalar K.larga boʻlinib, ular shu sahna epizodidagi ishtirokchilar tarkibi bilan belgilanadi; K.lar bir-biridan personajlardan birining sahnadan ketishi yoki boshqa personajning kelib qoʻshilishi bilan ajratiladi. Antik Rim adabiyotidayoq dramatik asar matnida K.lar alohida ajratilib, raqamlab koʻrsatilgan. Dramaturgiyada uzoq vaqt hukm surgan bu anʼanadan XIX asr oxiri – XX asr boshlaridan chekinila boshlangan. Hozirda ham dramatik asarda parda ichidagi K.lar farqlanib turadi, lekin matnda buni doim ham taʼkidlab, alohida ajratib koʻrsatish shart qilinmaydi.
Кўриниш – драматик асарнинг энг кичик таркибий қисми. Одатда, пардалар К.ларга бўлиниб, улар шу саҳна эпизодидаги иштирокчилар таркиби билан белгиланади; К.лар бир-биридан персонажлардан бирининг саҳнадан кетиши ёки бошқа персонажнинг келиб қўшилиши билан ажратилади. Антик Рим адабиётидаёқ драматик асар матнида К.лар алоҳида ажратилиб, рақамлаб кўрсатилган. Драматургияда узоқ вақт ҳукм сурган бу анъанадан XIX аср охири – XX аср бошларидан чекинила бошланган. Ҳозирда ҳам драматик асарда парда ичидаги К.лар фарқланиб туради, лекин матнда буни доим ҳам таъкидлаб, алоҳида ажратиб кўрсатиш шарт қилинмайди.
Manba: Dilmurod Quronov, Zokirjon Mamajonov, Mashhura Sheraliyeva. Adabiyotshunoslik lugʻati / f.f.d. D. Quronovning umumiy tahriri ostida. – Toshkent: Akademnashr, 2010. – 400 b.