Muallif

Muallif (ar. مولف – tuzuvchi, tartib beruvchi) – adabiy asarni yaratgan odam, avtor terminiga sinonim sifatida ishlatiladi. Zamonaviy adabiyotshunoslikda biografik M. bilan badiiy matnda namoyon boʻluvchi M. (q. muallif obrazi) farqlanadi. Biografik M. – real hayotda mavjud boʻlgan, muayyan asarning yaratuvchisi, unga nisbatan mualliflik huquqiga ega boʻla oladigan shaxs. Hozirgi vaqtda biografik M. faoliyati bilan bogʻliq ravishda mualliflik huquqi, mualliflik shartnomasi, muallif qoʻlyozmasi, mualliflashtirilgan matn, muallif tarjimasi kabi qator tushunchalar amaliyotda faol ishlatiladi. Holbuki, M. tushunchasi soʻz sanʼatining ilk bosqichlarida – xalq ogʻzaki ijodida boʻlmagan; adabiyot taraqqiyoti davomida, badiiy tafakkur rivojida alohida ijodkor shaxs roli, uning ijodiy tajribalari nechogʻli muhim ekanligi anglanib borilishi barobaridadada M. tushunchasi ham qaror topib, tobora katta ahamiyat kasb etib borgan.

Муаллиф (ар. مولف – тузувчи, тартиб берувчи) – адабий асарни яратган одам, автор терминига синоним сифатида ишлатилади. Замонавий адабиётшуносликда биографик М. билан бадиий матнда намоён бўлувчи М. (қ. муаллиф образи) фарқланади. Биографик М. – реал ҳаётда мавжуд бўлган, муайян асарнинг яратувчиси, унга нисбатан муаллифлик ҳуқуқига эга бўла оладиган шахс. Ҳозирги вақтда биографик М. фаолияти билан боғлиқ равишда муаллифлик ҳуқуқи, муаллифлик шартномаси, муаллиф қўлёзмаси, муаллифлаштирилган матн, муаллиф таржимаси каби қатор тушунчалар амалиётда фаол ишлатилади. Ҳолбуки, М. тушунчаси сўз санъатининг илк босқичларида – халқ оғзаки ижодида бўлмаган; адабиёт тараққиёти давомида, бадиий тафаккур ривожида алоҳида ижодкор шахс роли, унинг ижодий тажрибалари нечоғли муҳим эканлиги англаниб борилиши баробаридадада М. тушунчаси ҳам қарор топиб, тобора катта аҳамият касб этиб борган.