Personaj

Personaj (lot. persona – shaxs, teatr maskasi) – badiiy adabiyotdagi inson obrazi, adabiy asardagi voqea ishtirokchisi, his-kechinma va nutq subyekti. P. termini qahramon, ishtirok etuvchi (dramatik asarda), xarakter terminlari bilan bitta sinonimik qatorni tashkil qilib, maʼno jihatidan neytral boʻlgani bois bu qatorda dominanta vazifasini oʻtaydi. Yaʼni P. termini ularning oʻrnida bemalol qoʻllanishi mumkin, biroq hamma P.larga nisbatan ham qahramon, ishtirok etuvchi yoki xarakter terminini ishlatib boʻlmaydi. Zero, ular oʻzining asarda tutgan mavqei, tashiyotgan gʻoyaviy-badiiy yukning salmogʻi, voqealardagi ishtiroki, umumlashtirish darajasi kabi qator jihatlardan farqlanadi, darajalanadi.

Персонаж (лот. persona – шахс, театр маскаси) – бадиий адабиётдаги инсон образи, адабий асардаги воқеа иштирокчиси, ҳис-кечинма ва нутқ субъекти. П. термини қаҳрамон, иштирок этувчи (драматик асарда), характер терминлари билан битта синонимик қаторни ташкил қилиб, маъно жиҳатидан нейтрал бўлгани боис бу қаторда доминанта вазифасини ўтайди. Яъни П. термини уларнинг ўрнида бемалол қўлланиши мумкин, бироқ ҳамма П.ларга нисбатан ҳам қаҳрамон, иштирок этувчи ёки характер терминини ишлатиб бўлмайди. Зеро, улар ўзининг асарда тутган мавқеи, ташиётган ғоявий-бадиий юкнинг салмоғи, воқеалардаги иштироки, умумлаштириш даражаси каби қатор жиҳатлардан фарқланади, даражаланади.