Roviy

Roviy (ar. راوي – hikoyachi, qissa aytuvchi, xabar, maʼlumot beruvchi) – epik asarlardagi rivoya subyekti, voqealarni hikoya qilayotgan, ular kechayotgan makon va zamon, ularda ishtirok etayotgan personajlarga oid tafsilotlarni yetkazib, tasvir predmetiga u yoki bu tarzda munosabat bildirayotgan shaxs. Epik asarda rivoya, koʻproq, muallif (konkretlashtirilmagan “uchinchi shaxs” ham aksar muallif sifatida tushuniladi), baʼzan esa personaj (mas., Gʻ.Gʻulom. “Shum bola”) tilidan olib boriladi. Shuningdek, baʼzan asarda bir necha R.ning ishtirok etishi ham kuzatiladi (mas., Oʻ.Hoshimov. “Ikki eshik orasi”; M.Muhammad Doʻst. “Lolazor”). Shunga qaramay, R.larning koʻpayishi rivoyaning butunligiga putur yetkazmaydi, chunki bu holda ham matndan muallif (yoki asosiy R. vazifasidagi personaj)ning tinglovchi maqomida turgani anglashilaveradi.

Ровий (ар. راوي – ҳикоячи, қисса айтувчи, хабар, маълумот берувчи) – эпик асарлардаги ривоя субъекти, воқеаларни ҳикоя қилаётган, улар кечаётган макон ва замон, уларда иштирок этаётган персонажларга оид тафсилотларни етказиб, тасвир предметига у ёки бу тарзда муносабат билдираётган шахс. Эпик асарда ривоя, кўпроқ, муаллиф (конкретлаштирилмаган “учинчи шахс” ҳам аксар муаллиф сифатида тушунилади), баъзан эса персонаж (мас., Ғ.Ғулом. “Шум бола”) тилидан олиб борилади. Шунингдек, баъзан асарда бир неча Р.нинг иштирок этиши ҳам кузатилади (мас., Ў.Ҳошимов. “Икки эшик ораси”; М.Муҳаммад Дўст. “Лолазор”). Шунга қарамай, Р.ларнинг кўпайиши ривоянинг бутунлигига путур етказмайди, чунки бу ҳолда ҳам матндан муаллиф (ёки асосий Р. вазифасидаги персонаж)нинг тингловчи мақомида тургани англашилаверади.