Sillabo-tonik sheʼr tizimi (yun. syllabe – boʻgʻin, tonos – urgʻu) – sheʼr misralarida urgʻuli va urgʻusiz boʻgʻinlarning bir tartibda guruhlanib takrorlanishiga asoslangan sheʼr tizimi, XX asrga qadar ushbu sheʼr tizimi “sillabo-metrik” deb nomlangan. Rus sheʼriyatida V.Trediakovskiy va M.Lomonosovlar oʻtkazgan islohotdan soʻng mazkur sheʼr tizimi yetakchilik qila boshlagan. Rus sillabo-tonik sheʼr tizimida beshta stopa (rukn) boʻlib, ular: xorey, yamb, daktil, anapest va amfibraxiy tarzida antik sheʼr tizimidan oʻzlashtirilgan terminlar bilan yuritiladi. Shu stopalarning tartibli takrori ritmni hosil qiladi, konkret sheʼr oʻlchovi esa uch stopali yamb, toʻrt stopali yamb qabilida nomlanadi.
Силлабо-тоник шеър тизими (юн. syllabe – бўғин, tonos – урғу) – шеър мисраларида урғули ва урғусиз бўғинларнинг бир тартибда гуруҳланиб такрорланишига асосланган шеър тизими, XX асрга қадар ушбу шеър тизими “силлабо-метрик” деб номланган. Рус шеъриятида В.Тредиаковский ва М.Ломоносовлар ўтказган ислоҳотдан сўнг мазкур шеър тизими етакчилик қила бошлаган. Рус силлабо-тоник шеър тизимида бешта стопа (рукн) бўлиб, улар: хорей, ямб, дактиль, анапест ва амфибрахий тарзида антик шеър тизимидан ўзлаштирилган терминлар билан юритилади. Шу стопаларнинг тартибли такрори ритмни ҳосил қилади, конкрет шеър ўлчови эса уч стопали ямб, тўрт стопали ямб қабилида номланади.
Manba: Dilmurod Quronov, Zokirjon Mamajonov, Mashhura Sheraliyeva. Adabiyotshunoslik lugʻati / f.f.d. D. Quronovning umumiy tahriri ostida. – Toshkent: Akademnashr, 2010. – 400 b.