Tersina (ital. terza rima – uchinchi qofiya) – italyan sheʼriyatidagi uch misrali bandlardan tarkiblangan sheʼr shakli. T. band shaklida yozilgan sheʼr aba bcb cdc ded... shaklida, yaʼni bandning 1- va 3-misralari oʻzaro, 2-misrasi esa keyingi bandning 1- va 3-misralari bilan qofiyalanadi. T. shaklida yozilgan sheʼr (yoki dostonning bobi) bitta alohida misra bilan yakunlanib, u oxirgi bandning 2-misrasi bilan qofiyalanadi: shu tariqa sheʼr ritmik-intonatsion jihatdan tugallik kasb etadi. Dante Aligyerining mashhur “Ilohiy komediyasi” T. shaklida yaratilgan boʻlib, bu asar mazkur band shaklining etaloniga aylanib qoldi.
Терцина (итал. terza rima – учинчи қофия) – итальян шеъриятидаги уч мисрали бандлардан таркибланган шеър шакли. Т. банд шаклида ёзилган шеър aba bcb cdc ded... шаклида, яъни банднинг 1- ва 3-мисралари ўзаро, 2-мисраси эса кейинги банднинг 1- ва 3-мисралари билан қофияланади. Т. шаклида ёзилган шеър (ёки достоннинг боби) битта алоҳида мисра билан якунланиб, у охирги банднинг 2-мисраси билан қофияланади: шу тариқа шеър ритмик-интонацион жиҳатдан тугаллик касб этади. Данте Алигьерининг машҳур “Илоҳий комедияси” Т. шаклида яратилган бўлиб, бу асар мазкур банд шаклининг эталонига айланиб қолди.
Manba: Dilmurod Quronov, Zokirjon Mamajonov, Mashhura Sheraliyeva. Adabiyotshunoslik lugʻati / f.f.d. D. Quronovning umumiy tahriri ostida. – Toshkent: Akademnashr, 2010. – 400 b.