Vofir

Vofir (ar. وافر – moʻl) – aruz bahrlaridan biri, harakati, yaʼni qisqa unlilari koʻp boʻlgani uchun shunday nom berilgan. Mafoilatun aslining (v – v v –) takroridan hosil boʻladi. V. arab sheʼriyatiga xos bahr boʻlib, oʻzbek va fors sheʼriyatida qoʻllanmagan. Faqat Navoiy oʻzining “Mezon ul-avzon” asarida V. bahrining ikki vazniga, Bobur esa “Muxtasar”da yigirma bir vazniga toʻxtalib, ularga maxsus baytlar bitganlar va misol sifatida keltirganlar. Xususan, “Muxtasar”da:

Kel ey qaro koʻz, manga guzar et,

Budur sanga soʻz, manga nazar et, –

bayti vofiri murabbaʼi solim (v – v v – \ v – v v –) vazniga misol qilib keltirilgan.

Вофир (ар. وافر – мўл) – аруз баҳрларидан бири, ҳаракати, яъни қисқа унлилари кўп бўлгани учун шундай ном берилган. Мафоилатун аслининг (v – v v –) такроридан ҳосил бўлади. В. араб шеъриятига хос баҳр бўлиб, ўзбек ва форс шеъриятида қўлланмаган. Фақат Навоий ўзининг “Мезон ул-авзон” асарида В. баҳрининг икки вазнига, Бобур эса “Мухтасар”да йигирма бир вазнига тўхталиб, уларга махсус байтлар битганлар ва мисол сифатида келтирганлар. Хусусан, “Мухтасар”да:

Кел эй қаро кўз, манга гузар эт,

Будур санга сўз, манга назар эт, –

байти вофири мураббаъи солим (v – v v – \ v – v v –) вазнига мисол қилиб келтирилган.