Maqolada adabiyotshunoslikdagi inson konsepsiyasi kategoriyasiga atroflicha taʼrif berilgan. Inson konsepsiyasi kategoriyasi badiiy konsepsiyaning negizi ekani asoslangan. Shu bilan birga, adabiyotni davrlashtirishda ushbu kategoriyaning ahamiyati haqida soʻz yuritilgan. Jumladan, badiiy tafakkurdagi mifopoetik, traditsionalistik, individual-ijodiy bosqichlar inson konsepsiyasi bilan qiyosan oʻrganilgan. Badiiy tafakkur evolyutsiyasining muayyan davr ijtimoiy shart-sharoitida vujudga kelgan inson konsepsiyasi taʼsirida harakatlanishi, zamonaviy oʻzbek adabiyotining rivoji, tarixiy taraqqiyot yoʻli, adabiy asrlar bevosita inson konsepsiyasidagi evrilishlar bilan bogʻliq ekani haqida xulosalar qilingan.
Kalit soʻzlar: inson konsepsiyasi, badiiy konsepsiya, badiiy tafakkur, arxaizm, traditsionalizm, individual-ijodiy badiiy tafakkur, adabiy davr, mumtoz adabiyot, zamonaviy oʻzbek adabiyoti.
Выявлено значение категории концепция человека в периодизации литературы. Доказывается, что категория концепции человека является основой художественной концепции. В частности, мифопоэтический, традиционалистский, индивидуально-творческий этапы в художественном мышлении исследуются в сравнении с концепцией человека. Сделаны выводы о том, что на эволюцию художественного мышления влияет концепция личности, возникшая в социальных условиях определенного периода, что развитие современной узбекской литературы, путь исторического развития и литературные эпохи являются непосредственно связано с концепцией человека.
“Inson kim?” – bu bani basharning azaliy va abadiy savoli. Oʻtgan ming yillar davomida din, falsafa, tarix, sanʼat, siyosat, ruhshunoslik, jamiyatshunoslik kabi sohalar mazkur savolga javob izlaydi. Nafaqat javob izlaydi, balki javob izlash jarayonida taraqqiy etadi. Yaʼni bu savol barcha madaniy, axloqiy, iqtisodiy, siyosiy tuzilmalarning shakllanishi va rivojlanishiga asos boʻladi.
Tarixning har bir yangi davri insonning borliqdagi oʻrni, uning hayotiy maqsad va vazifalarini oʻziga xos tarzda tushunish hamda talqin qilish evaziga vujudga kelgan. Zero, insoniyat oʻzi haqidagi tasavvurlari, xulosalariga tayanib jamiyatni tartibga soladi.
Yashash tarzi, dunyoqarashini “Inson kim?” savoliga javob izlash oʻlaroq shakllantiradi.
Muhim jihati shuki, ushbu savolning javobi bashar uchun yagona emas. Turli din, millat, madaniyatlarda, hatto, yakka individlarda javoblar farqli boʻlishi mumkin. Biroq javoblar har qancha farq qilmasin, bu savol odamlarni birlashtirishga, hayotiy maqsad va vazifalarini umumlashtirishga qodir.
Adabiyotshunoslikka oid asarlarda badiiy adabiyotning bosh vazifasi sifatida uning bilish (evristik) funksiyasi qayd etiladi. Yaʼni adabiyot borliqni, undagi voqea-hodisalarni, jumladan, insonni oʻrganish maqsadi ustiga bunyod boʻlgan: “Badiiy adabiyot borliqni obrazlar vositasida badiiy idrok qilish orqali bizning olam, odam, jamiyat haqidagi bilim va tasavvurlarimizni boyitadi” [9. B.
97]. Oʻzining bu vazifasini amalga oshirish yoʻlida adabiyot voqea-hodisalar markaziga insonni qoʻydi. Negaki, “borliqning oʻzida inson shu xil mavqe egallaydi. Shunday ekan, badiiy adabiyotning borliqni idrok etishida inson obrazining asosiy vosita boʻlishi ham tabiiy va qonuniydir” [9. B. 53]. Demak, “Inson kim?” savoli adabiyotning, jumladan, ijodkorning ham bosh muammosidir. Biroq, bu savolga yechim izlashda, adabiyotning boshqa sohalarga qaraganda katta ustunligi bor. Adabiyot odam va olam munosabatlarining yaxlit modelini yaratgan holda, turli ijodiy eksperimentlar vositasida savollarga javob izlash, oʻz xulosalarini “tirik” obrazlar orqali koʻrsatish imkoniga ega. Ayni shu jihat, yaʼni badiiy adabiyotning muayyan bir asar, ijodkor yoki davrda insonning olamdagi maqomi, maqsad va vazifalari yuzasidan chiqargan yaxlit hukmi inson konsepsiyasidir.
Adabiyotda inson konsepsiyasining namoyon boʻlishi tabiiy va qonuniniy jarayondir. Zotan, adabiyotning evristik funksiyasidan tashqari badiiy-konseptual funksiyasi ham mavjudki, bu uning yana bir oʻta muhim vazifasi sanaladi. Badiiy adabiyot borliqni, mavjud voqelikni taftish qilish asnosida olam va odam haqida yaxlit badiiy hukm – badiiy konsepsiyani yaratadi. Adabiyotning markazida inson turishini hisobga olsak, badiiy konsepsiyaning negizini ham inson konsepsiyasi tashkil etishi oydinlashadi. Adabiyotshunos Mixail Golberg inson konsepsiyasiga shunday taʼrif beradi: “Inson konsepsiyasi juda ham keng qamrovli kategoriya (tushuncha) boʻlib, odamning olam va dunyoqarash, mafkura, axloq, estetik aloqalar hamda oʻzaro boshqa munosabat shakllarining ichki mohiyati majmui sifatida namoyon boʻladi” [5. B. 286]. Koʻrinadiki, ijodkor olam haqidagi kompleksli, yaxlit hukmga inson konsepsiyasi orqali yetib boradi.
Inson konsepsiyasi badiiy asarni baholashda qanchalar muhim boʻlmasin, adabiyotshunoslikda alohida kategoriya sifatida nisbatan kam oʻrganilgan. Adabiyotshunoslik nazariyasiga oid kitoblarda mazkur kategoriya taʼrifiga deyarli toʻxtalinilmagan, adabiyotshunoslik terminlar lugʻatida ham uchramaydi.
Bizningcha, bu inson konsepsiyasi kategoriyasining odatda badiiy konsepsiya tarkibida koʻrilgani bilan bogʻliq.
Rus adabiyotshunosligida inson konsepsiyasi istilohini ilk bor oʻtgan asrning 50-yillarida L.Timofeyev qoʻllaydi. Shu davrdan boshlab turli tadqiqotlarda bu tushunchaga bot-bot duch kelish mumkin boʻldi. Adabiyotshunos Ye.Gaponning taʼkidlashicha, L.Timofeyevga qadar adabiyotdagi inson muammosiga “obraz”, “qahramon”, “xarakter” kabi tushunchalar vositasida yechim izlangan [6. B. 3]. Biroq “inson konsepsiyasi” istilohi sanab oʻtilgan tushunchalarga nisbatan adabiy qahramonni ancha keng qamrovda, konseptual tarzda tushuntiradi. “Insonning badiiy konsepsiyasi, – yozadi yana bir rus adabiyotshunosi L.Kolobayeva, – maʼlum bir adabiy kontekstda odamni shaxs sifatida tushunish va tasvirlash yoʻlidagi turli tamoyillar, gʻoyalar, qarashlar majmuini anglatuvchi tushunchadir. Inson konsepsiyasi yozuvchi ijodiy olamining mazmuni sifatida faqat bitta asarning emas, balki butun ijodiy yoʻlni va uning turli bosqichlarini xarakterlovchi, estetik qonuniyatlarini belgilovchi asosdir” [7. B. 35]. Anglashiladiki, inson konsepsiyasi tushunchasi bizga muayyan asarni yoki adabiy davrni muallifning badiiy-gʻoyaviy konsepsiyasi bilan bevosita aloqadorlikda baholashga imkon beruvchi tizimdir.
Shu oʻrinda mazkur kategoriyaga nisbatan turli shakldagi terminlar qoʻllangani eʼtiborga molik. Xususan, oʻzbek adabiyotshunosligida mazkur kategoriyaning “insonning badiiy konsepsiyasi”, “shaxs konsepsiyasi”, “inson konsepsiyasi” kabi turli shakldagi terminlarini uchratish mumkin. Izohli lugʻatlarga koʻra “inson” va “odam” soʻzlari maʼno jihatdan keskin farq qilmasa-da, ular isteʼmolda farqlanadi.
Yaʼni “inson” koʻp hollarda “shaxs” soʻziga sinonim qoʻyiladiki, bu uni ijtimoiy-axloqiy hodisa sifatida gavdalantiradi. Tabiiy fanlarga oid adabiyotlarda esa “odam” soʻzini qoʻllash anʼanaga aylangan. Bunday adabiyotlarda biz “odam”ni shaxs sifatida emas, biologik mavjudot sifatida tushunishga odatlanganmiz. Bu mulohazalarimizni tilshunoslik nuqtai nazaridan aniq dalillay olmasak-da, ushbu maqolada inson – shaxs, odam – biologik mavjudot sifatida talqin etilganini alohida qayd etishga zarurat sezamiz. Zero, bu oʻrinda “inson konsepsiyasi”, “insonning badiiy konsepsiyasi” yoxud “shaxs konsepsiyasi” terminlari ayni bir maʼnoni anglatadi.
Badiiy tafakkur inson tafakkuri bilan oʻzaro aloqadorlikda rivojlanadi. Yaʼni insonning tarix sahnasidagi ijtimoiy, madaniy, iqtisodiy, siyosiy taraqqiyoti toʻgʻridantoʻgʻri badiiy adabiyotga koʻchib oʻtadi. Bizning muayyan ijtimoiy shart-sharoitda shakllangan dunyoqarashimiz, borliqdagi maqomimizni qanday belgilashimiz shu davr paradigmasini shakllantiradi: “Insoniyat tarixi – paradigmalar almashuvidir. Inson, oʻz oldiga qoʻygan oliy maqsadi qadrsizlanayotganini sezgach, yangi maqsadlarni koʻzlaydi va unga qarab intiladi” [2. B. 160]. Shakllangan yangi paradigma esa konseptual ravishda, avvalo, badiiy adabiyotda boʻy koʻrsatadi. Demak, biz “Inson kim?” savoliga javob izlash asnosida butun tarixni davrlashtirish bilan birga, adabiyotning tadrijiy taraqqiyot yoʻlini ham yaxlit xaritada koʻrishimiz mumkin boʻladi.
Mashhur fin olimi P.Kuusi insoniyatning madaniy evolyutsiyasini quyidagi uch yirik bosqichda tasniflaydi:
1. Ovchi va terimchilar madaniyati.
2. Agrar madaniyat.
3. Ilmiy-texnologik madaniyat [8. B. 101].
Yana bir mashhur tarixchi, “Sapiyens: Insoniyatning qisqacha tarixi” nomli bestseller muallifi Yuval Noa Harari ham insoniyat taraqqiyotini uch bosqichga ajratarkan, Kuusidan farqli oʻlaroq, birinchi bosqichni “Kognitiv inqilob” deb nomlaydi: “Bashariyatning tarixiy yoʻlini uch yirik inqilob belgilab beradi. 70 ming yil muqaddam roʻy bergan kognitiv inqilob tarixni boshlab bergan boʻlsa, jarayonni 12 ming yil oldingi agrar inqilob tezlashtirdi. Atigi 500 yil oldin boshlangan ilmiy inqilob esa tarixni batamom yakunlashi va sayyorada tamomila boshqa bir hodisalarning vujudga kelishiga sabab boʻlishi mumkin” [11. B. 6].
Tarix kontekstida olib qaralsa, madaniyatning, umuman, insonning dunyoqarashi shakllanishida uch omil muhim ahamiyat kasb etgan. Ovchi va terimchilarning dunyoqarashi bevosita tabiat – tabiiylik taʼsirida shakllangan. Bu davrda inson – tabiatning ajralmas bir uzvi. Tabiiylikka qanoat qilib, faqat ovchilik va termachilik ortidan kun koʻradi. Uning bosh maqsadi tabiatning suronli sharoitlarida omon qolish va nasl qoldirishdan iborat.
Agrar inqilob odamlarning oʻtroqlashishi, tabiat neʼmatlarini boʻysundirishi – xonakilashtirishi bilan boshlangan. Dehqonchilik va chorvachilik bilan kun koʻra boshlagan odamlarning hayot tarzi nisbatan yengillashadi.
Oʻta xatarli va mashaqqatli boʻlgan ovchilikka ehtiyojning kamayishi yer yuzi aholisining ortishiga sabab boʻladi. Chunki odamlar endi yegulikni hayotlarini xavf ostiga qoʻymay, koʻp miqdorda topishlari va zaxiraga olishlari mumkin edi. Oziq-ovqatning koʻpayishi esa oʻz-oʻzidan tugʻilish va yashash sifatining oʻsishiga xizmat qiladi. Shu omillar sabab, kichik markaz, shahar va davlatlar yuzaga kela boshlaydi. Natijada odamlar ijtimoiylashadi. Keyinroq pul ixtiro qilinadi. Savdosotiqning vujudga kelishi esa oʻzaro kommunikatsiyani taʼminlaydi. Shunday qilib koʻp qirrali madaniy jamiyatlar yuzaga keladi.
Endi inson axloqi, uning olam haqidagi tasavvurlari tabiat hodisalari vositasida emas, balki ijtimoiy-madaniy kontekstda shakllanadi va rivojlanadi.
Nisbatan yaqin tarixda sodir boʻlgan ilmiy inqilobga aynan qaysi voqea turtki boʻlgani yuzasidan olimlarning farazlari turlicha.
Ilmiy hamjamiyat anʼanasiga koʻra, bu inqilob Uygʻonish davrining soʻngida, 1543 yili Nikolay Kopernikning “Osmon sferalarining aylanishi haqida” nomli kitobining eʼlon qilinishi bilan boshlangan. Yu.Harariga koʻra, 1492 yili Xistofor Kolumb tomonidan Amerika qitʼasining topilishi ilmiy inqilobni boshlab bergan: “Amerikaning kashf etilishi yevropaliklarni real kuzatuvlarni oʻtmish anʼanalaridan ustun qoʻyishga undadi. Qitʼani oʻzlashtirishga boʻlgan ishtiyoq esa ulardan yangi bilimlarni tezroq rivojlantirishni talab etardi” [11. B. 194]. Albatta, bu qarashlarning har birida muayyan darajada haqiqat mavjud, shu bilan birga ularning birortasi mutlaq toʻgʻri boʻla olmasligi ham ayni haqiqat. Bizningcha, bu faktlar jahon tarixi sahnasida kichik bir ramz vazifasini oʻtaydi, xolos.
Haqiqat shundaki, ilmiy inqilob XV asrning soʻngi hamda XVII asrning boshlarigacha boʻlgan oraliqda sodir boʻldi va zamonaviy ilm-fan taraqiyoti uchun zamin yaratdi. Ilmiy inqilob bizga kvantlar olamida “sayr qilish”, Oyga uchish, kompyuter bilan suhbatlashish va tana aʼzolarimizni sunʼiylashtirish imkonini berdi. Lekin shular bilan birga, u insoniyatga atom bombasini ham “tortiq” qildi. Endi insoniyat nafaqat dunyoni oʻzgartirishga, balki undagi hayotni yoʻq qilib yuborishga ham qodir ekani ayon boʻldi.
Ilm-fanning taraqqiy etishi bizning olam va odam haqidagi tasavvurlarimizni inqilobiy tarzda kengaytirdi, ayni damda juda koʻplab bir-birini inkor qiluvchi tarmoqlarga ajratib tashladi. Bu hodisalar shaxs va jamiyat oldiga yangi maqsad va vazifalarni qoʻyish bilan birga, bizni javobsiz savollar girdobida jarlik tomon tortayotgani ham haqiqat. Zotan, taraqqiyot taqdim etayotgan global isish, yadroviy qurollanish, axborot xurujlari, terrorizm, bir xil jinslilar nikohi kabi muammolar insoniyatning mavjudlik haqidagi yagona gʻoya atrofida birlasha olmasligi, inson konsepsiyasining turfa xilligi oqibatidir.
Adabiyotni davrlashtirish masalasida ham xuddi insoniyatning madaniy bosqichlari kabi uch davr eʼtiborga olinadi. Yetakchi adabiyotshunoslardan iborat mualliflar guruhiga koʻra, “badiiy tafakkurning eng umumiy va barqaror uchta: 1) arxaik yoki mifopoetik; 2) traditsionalistik yoki normativ; 3) individual-ijodiy yoki tarixiy tiplari” [1. B. 4] mavjud.
Badiiy tafakkurning arxaik (mifopoetik) bosqichi paleolit davridan boshlab antik Yunonistonda miloddan avvalgi VII–VI asrlar, Sharqda esa milodiy I asrgacha davom etgan.
Traditsionalizm (normativ poetika) bosqichi Yevropada miloddan avvalgi VI–V asrlardan XVIII asr oʻrtalarigacha, Sharqda esa milodiy I asrdan XIX asr oxiri – XX asr boshlarigacha davom etib, eng uzoq muddat – ikki yarim ming yillik davrni qamrab oladi.
Individual-ijodiy bosqich Yevropada XVIII asr oʻrtalaridan, Sharqda XIX asr oxiri – XX asr avvalidan boshlanib, hozirga qadar davom etmoqda.
Biz yuqoriroqda sanab oʻtgan tarixiy bosqichlar va badiiy tafakkur bosqichlarining bu qadar uygʻun kelishi, albatta, tasodif emas.
Sababi, adabiyotshunoslik muayyan davr adabiyotini oʻrganar ekan, avvalo, shu davr ijtimoiy-tarixiy sharoitini hisobga oladi. Chunki “har bir davr adabiyotining rivojlanish darajasi, undagi turfa adabiy hodisalar koʻp jihatdan ijtimoiy-tarixiy sharoit bilan bogʻliq boʻladi. Ijtimoiy-tarixiy sharoit deganda jamiyatning ijtimoiy-iqtisodiy, madaniy va maʼrifiy holati tushuniladiki, bular bari badiiy adabiyot taraqqiyotining tashqi omili (taʼkid bizniki – S.Q.) sanaladi” [9.
B. 418]. Shunday ekan, inson konsepsiyasi bir vaqtda ham adabiy-falsafiy, ham ijtimoiy kategoriyadir. Quyida bu xulosaning nechogʻlik toʻgʻri ekanini, tarixning muayyan bosqichidagi ijtimoiy-tarixiy sharoit, shu davrga xos badiiy tafakkur va inson konsepsiyasi masalalarini oʻzaro uygʻun, yaxlit madaniy hodisa sifatida koʻrib chiqish orqali baholashga harakat qilamiz.
Badiiy tafakkurning mifopoetik bosqichga xos asosiy xususiyati sifatida sinkretiklik koʻrsatiladi. Sinkretizm yunoncha “farqlamaslik” soʻzidan olingan boʻlib, butun borliqni yaxlit tushunish demakdir. Sinkretizm – “inson tafakkurining hali boʻlinmagan holati” [4. B. 6]. Yaʼni “tabiat bilan insonni, soʻz bilan u anglatgan narsani, “men” bilan “oʻzga”ni, hayotiy amal bilan sanʼatni farqlamasdan qabul qiladigan, hali abstrakt fikrlash va refleksiya (oʻzini anglash)ga qobil boʻlmagan ongga xos tafakkur nazarda tutiladi” [9. B. 425]. Arxaik bosqichda sanʼat ham bir butun hodisa boʻlgan. Bu davrda sanʼatning turlari, umuman, ularni turlarga ajratuvchi chegara mavjud emasdi. Shu maʼnoda, sanʼatshunoslar sinkretizm istilohini sanʼatning qadimiy, hali turlarga xos spetsifik xususiyatlar boʻy koʻrsatmagan shakliga nisbatan ham qoʻllaydilar [3. B. 312]. Qadimgi odamlarning diniy rituallari sinkretizmga yorqin misol boʻla oladi. Bunday rituallarda odamlar bir vaqtning oʻzida qoʻshiq kuylashi (tabiatga murojaat qilib omonlik yoki yaxshi oʻlja soʻrashi), raqsga tushishi, nogʻora chalishi yo sahna elementlarini koʻrsatishi mumkin edi. Eʼtiborli jihati, rituallardagi sanʼat hodisalarining biri ikkinchisidan farqlanmagan. Boshqacha aytganda, bu “sanʼat” shu rituallardagina mavjud boʻlgan yaxlit marosimning muhim elementlari hisoblangan.
Arxaik bosqichda “inson tafakkurining hali boʻlinmagan”ligi, paleolit davrining shart-sharoitlari bilan bevosita bogʻliq.
Zero yuqorida ham qayd etganimizdek, bu davrda inson ongi serqirra ijtimoiy munosabatlar asosida emas, tabiat hodisalari, tabiiy shart-sharoitlar taʼsirida rivojlangan. Shu omil tufayli inson oʻzini tabiatning ajralmas bir qismi sifatida his qila olardi, xolos. Biz buni eng qadimgi xalq ogʻzaki ijodi namunalari misolida ham koʻrishimiz mumkin.
Yirik folklorshunos Olga Freydenberg mifga “tafakkurning beixtiyor shakli” [12. B.
119] deya taʼrif beradi. Darhaqiqat, qadimgi insonlar miflarni qasddan yaratmaganlar.
Miflar odamlarning kundalik hayotidagi urf-odatlari va rituallari doirasida oʻzoʻzidan, mavjud udumlarning bayoni sifatida paydo boʻlgan.
Ibtidoiy odamlar uchun mif olamni bilishning asosiy vositasi hisoblangan. Shu maʼnoda miflar qadimgi odamlarning fikrlash tarzi, dunyoqarashi haqida keng maʼlumot bera oladi. Inson oʻzini tabiatning bir qismi sifatida tasavvur qilgan kezlarda atrofidagi narsalarga ham oʻzidagi sifatlardan kelib chiqib baho bergan. Shu sababli u tabiatdagi narsalarga insonga xos xususiyatlarni koʻchirgan. Yaʼni qadimgi odamning tasavvuricha, atrofdagi narsalar ham inson kabi fikrlaydi, inson kabi hayot kechiradi. Mifning fetishizm, animizm va totemizm kabi turlari ham ana shu tasavvurlarning mahsulidir.
Traditsionalizm badiiy tafakkur taraqqiyotida nisbatan eng uzoq muddat, qariyb ikki yarim ming yil hukm surgan bosqichdir.
Mazkur bosqichning bu qadar uzoq muddat davom etgani asrlar mobaynida ijtimoiy shartsharoitning deyarli oʻzgarmagani, feodal tuzimning barqarorligi, mustahkam diniy eʼtiqod, jamiyatlararo kommunikatsiyaning sustligi, ilf-fan inqilobining “kechikkani” kabi qator omillar bilan bogʻlanadi. Taʼkidlash zarurki, traditsionalizmning ikki yarim ming yillik umri dunyo madaniyati tarixidagi umumiy hisob boʻlib, u alohida olingan sivilizatsiyalarda bu qadar uzoq yashamagan.
Ijtimoiy shart-sharoitning oʻzgarishi, yangi paradigma va inson konsepsiyasining shakllanishiga qarab traditsionalizm Gʻarbu Sharqda turli davrlarda, turlicha vaqt chegaralarida dominantlik qilgan.
Mifopoetik bosqichda sinkretizm muhim ahamiyat kasb etgan boʻlsa, traditsionalizmga kelib sanʼat turlari oʻzidagi spetsifik jihatlarni yaqqol koʻrsata boshladi. Jumladan, adabiyot ham alohida soha sifatida shakllandi.
Traditsionalizmni farqlovchi eng muhim jihat ijodiy jarayonda anʼanaviylikning ustun turishidir. Xususan, Sharq mumtoz adabiyotida ijodkor mavzuni yoritishda imkon qadar ijtimoiylikdan qochadi, ifodada zamon va makon uygʻunligini taʼminlamaydi, qolaversa, talqinda oʻziga xoslikka intilmaydi. Yaʼni bu davr ijodkorlari oʻzining shaxsiy kechinmalarini, anʼanadan keskin farq qiluvchi fikr va gʻoyalarini ilgari surmagan. Professor D.Quronov bu haqda shunday yozadi: “...garchi mumtoz sheʼrda koʻngil izhori asosan “men” tilidan berilsa-da, haqiqatda uning ortida muayyan bir shaxs emas, koʻproq oʻquvchiga avvaldan tanish lirik subyektlardan biri – oshiq, mutafakkir, nosih yo zamonadan kuygan jabrdiyda namoyon boʻlaveradi. Ayni hol jamiyatda shaxs maqomi kuchaygan sharoitga muvofiq emas” [10. B. 192]. Xuddi shu omillar Sharq mumtoz adabiyotida muallif shaxsiyatiga ham parda tortadi. Baʼzan muallif yozgan asariga oʻz imzosini ham qoʻymagan. Zero, olamni faqat diniy-axloqiy mezonlar asosida tushungan inson, tabiiy ravishda, hayotini qatʼiy anʼanalar asosiga qurgan. Bu davr estetik qarashlarining birlamchi haqiqati sifatida dunyoning foniy ekanligi aytilgan, sanʼatkor uchun chinakam goʻzallik esa olam va odamning botini hisoblangan.
Mumtoz adabiyotda estetik tasavvurlar axloqdan ajratilmagan. Zero, mumtoz mutafakkirlar nazdida insonning asl goʻzalligi maʼnaviy goʻzallikdir. Shu kabi omillar sabab bu davrda insonning realistik tasviri badiiy qiymatga ega emasdi. Yaʼni, mumtoz ijodkor qahramonlarni real voqelikdagi xatti-harakatlari vositasida emas, balki mutlaq ideal tushunchalar orqali tasvirlaydi. Qahramonda eng goʻzal islomiy sifatlar (taqvo, ilm, odob, adolat, maʼrifat va b.) mavjudligini taʼrifda aytilganining oʻzi yetarli hisoblangan (yaʼni, masalan, taqvoli odam deyilishining oʻzida qiyofa haqidagi anʼanaviy tasavvur ham bor). Shu sababli ham shoir qahramondagi shunday sifatlar taʼrifiga koʻproq urgʻu beradi: sifat qay darajada mukammal va original taʼriflansa, shu darajada individual qiyofa hosil boʻladi. Natijada yerdan butunlay uzilgan, Sharqning ideal gʻoya va maqsadlariga yoʻgʻrilgan qahramon yaratiladi. Shu oʻrinda oʻrta asrlar falsafasiga rus adabiyotshunosi Yuriy Borevning: “...inson – gunohkor banda, choʻqqilarni zabt etishga yoʻnalish olgan va kamolga yetgach, dunyo saodatiga erishish uchun dunyo neʼmatlaridan voz kechgan – muqaddas zot” deya bergan taʼrifi Sharq mumtoz adabiyotidagi komil inson konsepsiyasiga ham mos ekanini qayd etmoq zarur.
Yuqorida taʼkidlaganimizdek, badiiy tafakkurdagi traditsionalizm Sharqda Gʻarbga nisbatan ancha uzoq muddat davom etadi. Xususan, milliy adabiyotimizda mumtoz adabiyot anʼanalari XX asr boshlarigacha davom etgani maʼlum. Bu vaqtga kelib maʼrifatchilik, sentimentalizm, romantizm kabi bosqichlardan oʻtib kelgan Gʻarb badiiy tafakkuri realizm va modernizm taʼsirida sayqal topayotgandi.
Bizda mazkur bosqichlarning ancha kech boshlangani, balki, qurama shaklda, bir vaqtning oʻzida namoyon boʻlgani ijtimoiy shart-sharoit va kommunikatsiya bilan bogʻliq. Zero, Turkistonda XX asrning boshlariga kelibgina anʼanaviy badiiy tafakkur qobigʻidan chiqish imkonini beruvchi ijtimoiy shart-sharoit vujudga keldi.
XX asr boshlarida ijtimoiy-madaniy hayotimizda sodir boʻlgan tub burilishlar, xususan, davriy nashrlarning paydo boʻlishi, jadidlar harakatining yuzaga kelishi, xorijiy adabiy oqimlarning taʼsiri natijasida birin-ketin realistik asarlar dunyo yuzini koʻra boshladi. Professor D.Quronov XX asr avvalida badiiy tafakkurda kechgan yangilanishning bosh omilini shunday izohlaydi:
“Hamma gap XX asr boshlari Turkiston jamiyatida shaxs maqomining oʻzgargani, insonning ijtimoiylashganida. Sodda qilib aytsak, Turkiston kishisi jamiyatning ahvoli, buguni va ertasi, mavjud holning sababi – xullas, siyosat haqida bosh qotiradigan boʻldi” [10. B. 191].
Haqiqatan, ijtimoiy hayotda sodir boʻlayotgan keskin oʻzgarishlar shu ijtimoiylikning bir boʻlagi – ijodkor shaxsini chetlab oʻtmadi.
Endi ijodkorning inson haqidagi, uning olamdagi oʻrni va maqomi haqidagi tasavvurlari oʻzgardi. Shunga mos ravishda, adabiyotda olam va odam munosabatlari haqidagi badiiy konsepsiya (inson konsepsiyasi) yangilanishi natijasida individual-ijodiy badiiy tafakkur bosqichiga oʻtildi.
Individual-ijodiy badiiy tafakkur bosqichining asosiy farqlovchi xususiyati realistik ifodadir. Anʼanaviy qoliplar taʼsiridan chiqa olgan ijodkor olamni individual tarzda badiiy mushohada qila boshladi. Ada-
Мақолада адабиётшуносликдаги инсон концепцияси категориясига атрофлича таъриф берилган. Инсон концепцияси категорияси бадиий концепциянинг негизи экани асосланган. Шу билан бирга, адабиётни даврлаштиришда ушбу категориянинг аҳамияти ҳақида сўз юритилган. Жумладан, бадиий тафаккурдаги мифопоэтик, традиционалистик, индивидуал-ижодий босқичлар инсон концепцияси билан қиёсан ўрганилган. Бадиий тафаккур эволюциясининг муайян давр ижтимоий шарт-шароитида вужудга келган инсон концепцияси таъсирида ҳаракатланиши, замонавий ўзбек адабиётининг ривожи, тарихий тараққиёт йўли, адабий асрлар бевосита инсон концепциясидаги эврилишлар билан боғлиқ экани ҳақида хулосалар қилинган.
Калит сўзлар: инсон концепцияси, бадиий концепция, бадиий тафаккур, архаизм, традиционализм, индивидуал-ижодий бадиий тафаккур, адабий давр, мумтоз адабиёт, замонавий ўзбек адабиёти.
Выявлено значение категории концепция человека в периодизации литературы. Доказывается, что категория концепции человека является основой художественной концепции. В частности, мифопоэтический, традиционалистский, индивидуально-творческий этапы в художественном мышлении исследуются в сравнении с концепцией человека. Сделаны выводы о том, что на эволюцию художественного мышления влияет концепция личности, возникшая в социальных условиях определенного периода, что развитие современной узбекской литературы, путь исторического развития и литературные эпохи являются непосредственно связано с концепцией человека.
“Инсон ким?” – бу бани башарнинг азалий ва абадий саволи. Ўтган минг йиллар давомида дин, фалсафа, тарих, санъат, сиёсат, руҳшунослик, жамиятшунослик каби соҳалар мазкур саволга жавоб излайди. Нафақат жавоб излайди, балки жавоб излаш жараёнида тараққий этади. Яъни бу савол барча маданий, ахлоқий, иқтисодий, сиёсий тузилмаларнинг шаклланиши ва ривожланишига асос бўлади.
Тарихнинг ҳар бир янги даври инсоннинг борлиқдаги ўрни, унинг ҳаётий мақсад ва вазифаларини ўзига хос тарзда тушуниш ҳамда талқин қилиш эвазига вужудга келган. Зеро, инсоният ўзи ҳақидаги тасаввурлари, хулосаларига таяниб жамиятни тартибга солади.
Яшаш тарзи, дунёқарашини “Инсон ким?” саволига жавоб излаш ўлароқ шакллантиради.
Муҳим жиҳати шуки, ушбу саволнинг жавоби башар учун ягона эмас. Турли дин, миллат, маданиятларда, ҳатто, якка индивидларда жавоблар фарқли бўлиши мумкин. Бироқ жавоблар ҳар қанча фарқ қилмасин, бу савол одамларни бирлаштиришга, ҳаётий мақсад ва вазифаларини умумлаштиришга қодир.
Адабиётшуносликка оид асарларда бадиий адабиётнинг бош вазифаси сифатида унинг билиш (эвристик) функцияси қайд этилади. Яъни адабиёт борлиқни, ундаги воқеа-ҳодисаларни, жумладан, инсонни ўрганиш мақсади устига бунёд бўлган: “Бадиий адабиёт борлиқни образлар воситасида бадиий идрок қилиш орқали бизнинг олам, одам, жамият ҳақидаги билим ва тасаввурларимизни бойитади” [9. Б.
97]. Ўзининг бу вазифасини амалга ошириш йўлида адабиёт воқеа-ҳодисалар марказига инсонни қўйди. Негаки, “борлиқнинг ўзида инсон шу хил мавқе эгаллайди. Шундай экан, бадиий адабиётнинг борлиқни идрок этишида инсон образининг асосий восита бўлиши ҳам табиий ва қонунийдир” [9. Б. 53]. Демак, “Инсон ким?” саволи адабиётнинг, жумладан, ижодкорнинг ҳам бош муаммосидир. Бироқ, бу саволга ечим излашда, адабиётнинг бошқа соҳаларга қараганда катта устунлиги бор. Адабиёт одам ва олам муносабатларининг яхлит моделини яратган ҳолда, турли ижодий экспериментлар воситасида саволларга жавоб излаш, ўз хулосаларини “тирик” образлар орқали кўрсатиш имконига эга. Айни шу жиҳат, яъни бадиий адабиётнинг муайян бир асар, ижодкор ёки даврда инсоннинг оламдаги мақоми, мақсад ва вазифалари юзасидан чиқарган яхлит ҳукми инсон концепциясидир.
Адабиётда инсон концепциясининг намоён бўлиши табиий ва қонуниний жараёндир. Зотан, адабиётнинг эвристик функциясидан ташқари бадиий-концептуал функцияси ҳам мавжудки, бу унинг яна бир ўта муҳим вазифаси саналади. Бадиий адабиёт борлиқни, мавжуд воқеликни тафтиш қилиш асносида олам ва одам ҳақида яхлит бадиий ҳукм – бадиий концепцияни яратади. Адабиётнинг марказида инсон туришини ҳисобга олсак, бадиий концепциянинг негизини ҳам инсон концепцияси ташкил этиши ойдинлашади. Адабиётшунос Михаил Гольберг инсон концепциясига шундай таъриф беради: “Инсон концепцияси жуда ҳам кенг қамровли категория (тушунча) бўлиб, одамнинг олам ва дунёқараш, мафкура, ахлоқ, эстетик алоқалар ҳамда ўзаро бошқа муносабат шаклларининг ички моҳияти мажмуи сифатида намоён бўлади” [5. Б. 286]. Кўринадики, ижодкор олам ҳақидаги комплексли, яхлит ҳукмга инсон концепцияси орқали етиб боради.
Инсон концепцияси бадиий асарни баҳолашда қанчалар муҳим бўлмасин, адабиётшуносликда алоҳида категория сифатида нисбатан кам ўрганилган. Адабиётшунослик назариясига оид китобларда мазкур категория таърифига деярли тўхталинилмаган, адабиётшунослик терминлар луғатида ҳам учрамайди.
Бизнингча, бу инсон концепцияси категориясининг одатда бадиий концепция таркибида кўрилгани билан боғлиқ.
Рус адабиётшунослигида инсон концепцияси истилоҳини илк бор ўтган асрнинг 50-йилларида Л.Тимофеев қўллайди. Шу даврдан бошлаб турли тадқиқотларда бу тушунчага бот-бот дуч келиш мумкин бўлди. Адабиётшунос Е.Гапоннинг таъкидлашича, Л.Тимофеевга қадар адабиётдаги инсон муаммосига “образ”, “қаҳрамон”, “характер” каби тушунчалар воситасида ечим изланган [6. Б. 3]. Бироқ “инсон концепцияси” истилоҳи санаб ўтилган тушунчаларга нисбатан адабий қаҳрамонни анча кенг қамровда, концептуал тарзда тушунтиради. “Инсоннинг бадиий концепцияси, – ёзади яна бир рус адабиётшуноси Л.Колобаева, – маълум бир адабий контекстда одамни шахс сифатида тушуниш ва тасвирлаш йўлидаги турли тамойиллар, ғоялар, қарашлар мажмуини англатувчи тушунчадир. Инсон концепцияси ёзувчи ижодий оламининг мазмуни сифатида фақат битта асарнинг эмас, балки бутун ижодий йўлни ва унинг турли босқичларини характерловчи, эстетик қонуниятларини белгиловчи асосдир” [7. Б. 35]. Англашиладики, инсон концепцияси тушунчаси бизга муайян асарни ёки адабий даврни муаллифнинг бадиий-ғоявий концепцияси билан бевосита алоқадорликда баҳолашга имкон берувчи тизимдир.
Шу ўринда мазкур категорияга нисбатан турли шаклдаги терминлар қўллангани эътиборга молик. Хусусан, ўзбек адабиётшунослигида мазкур категориянинг “инсоннинг бадиий концепцияси”, “шахс концепцияси”, “инсон концепцияси” каби турли шаклдаги терминларини учратиш мумкин. Изоҳли луғатларга кўра “инсон” ва “одам” сўзлари маъно жиҳатдан кескин фарқ қилмаса-да, улар истеъмолда фарқланади.
Яъни “инсон” кўп ҳолларда “шахс” сўзига синоним қўйиладики, бу уни ижтимоий-ахлоқий ҳодиса сифатида гавдалантиради. Табиий фанларга оид адабиётларда эса “одам” сўзини қўллаш анъанага айланган. Бундай адабиётларда биз “одам”ни шахс сифатида эмас, биологик мавжудот сифатида тушунишга одатланганмиз. Бу мулоҳазаларимизни тилшунослик нуқтаи назаридан аниқ далиллай олмасак-да, ушбу мақолада инсон – шахс, одам – биологик мавжудот сифатида талқин этилганини алоҳида қайд этишга зарурат сезамиз. Зеро, бу ўринда “инсон концепцияси”, “инсоннинг бадиий концепцияси” ёхуд “шахс концепцияси” терминлари айни бир маънони англатади.
Бадиий тафаккур инсон тафаккури билан ўзаро алоқадорликда ривожланади. Яъни инсоннинг тарих саҳнасидаги ижтимоий, маданий, иқтисодий, сиёсий тараққиёти тўғридантўғри бадиий адабиётга кўчиб ўтади. Бизнинг муайян ижтимоий шарт-шароитда шаклланган дунёқарашимиз, борлиқдаги мақомимизни қандай белгилашимиз шу давр парадигмасини шакллантиради: “Инсоният тарихи – парадигмалар алмашувидир. Инсон, ўз олдига қўйган олий мақсади қадрсизланаётганини сезгач, янги мақсадларни кўзлайди ва унга қараб интилади” [2. Б. 160]. Шаклланган янги парадигма эса концептуал равишда, аввало, бадиий адабиётда бўй кўрсатади. Демак, биз “Инсон ким?” саволига жавоб излаш асносида бутун тарихни даврлаштириш билан бирга, адабиётнинг тадрижий тараққиёт йўлини ҳам яхлит харитада кўришимиз мумкин бўлади.
Машҳур фин олими П.Кууси инсониятнинг маданий эволюциясини қуйидаги уч йирик босқичда таснифлайди:
1. Овчи ва теримчилар маданияти.
2. Аграр маданият.
3. Илмий-технологик маданият [8. Б. 101].
Яна бир машҳур тарихчи, “Сапиенс: Инсониятнинг қисқача тарихи” номли бестселлер муаллифи Ювал Ноа Ҳарари ҳам инсоният тараққиётини уч босқичга ажратаркан, Куусидан фарқли ўлароқ, биринчи босқични “Когнитив инқилоб” деб номлайди: “Башариятнинг тарихий йўлини уч йирик инқилоб белгилаб беради. 70 минг йил муқаддам рўй берган когнитив инқилоб тарихни бошлаб берган бўлса, жараённи 12 минг йил олдинги аграр инқилоб тезлаштирди. Атиги 500 йил олдин бошланган илмий инқилоб эса тарихни батамом якунлаши ва сайёрада тамомила бошқа бир ҳодисаларнинг вужудга келишига сабаб бўлиши мумкин” [11. Б. 6].
Тарих контекстида олиб қаралса, маданиятнинг, умуман, инсоннинг дунёқараши шаклланишида уч омил муҳим аҳамият касб этган. Овчи ва теримчиларнинг дунёқараши бевосита табиат – табиийлик таъсирида шаклланган. Бу даврда инсон – табиатнинг ажралмас бир узви. Табиийликка қаноат қилиб, фақат овчилик ва термачилик ортидан кун кўради. Унинг бош мақсади табиатнинг суронли шароитларида омон қолиш ва насл қолдиришдан иборат.
Аграр инқилоб одамларнинг ўтроқлашиши, табиат неъматларини бўйсундириши – хонакилаштириши билан бошланган. Деҳқончилик ва чорвачилик билан кун кўра бошлаган одамларнинг ҳаёт тарзи нисбатан енгиллашади.
Ўта хатарли ва машаққатли бўлган овчиликка эҳтиёжнинг камайиши ер юзи аҳолисининг ортишига сабаб бўлади. Чунки одамлар энди егуликни ҳаётларини хавф остига қўймай, кўп миқдорда топишлари ва захирага олишлари мумкин эди. Озиқ-овқатнинг кўпайиши эса ўз-ўзидан туғилиш ва яшаш сифатининг ўсишига хизмат қилади. Шу омиллар сабаб, кичик марказ, шаҳар ва давлатлар юзага кела бошлайди. Натижада одамлар ижтимоийлашади. Кейинроқ пул ихтиро қилинади. Савдосотиқнинг вужудга келиши эса ўзаро коммуникацияни таъминлайди. Шундай қилиб кўп қиррали маданий жамиятлар юзага келади.
Энди инсон ахлоқи, унинг олам ҳақидаги тасаввурлари табиат ҳодисалари воситасида эмас, балки ижтимоий-маданий контекстда шаклланади ва ривожланади.
Нисбатан яқин тарихда содир бўлган илмий инқилобга айнан қайси воқеа туртки бўлгани юзасидан олимларнинг фаразлари турлича.
Илмий ҳамжамият анъанасига кўра, бу инқилоб Уйғониш даврининг сўнгида, 1543 йили Николай Коперникнинг “Осмон сфераларининг айланиши ҳақида” номли китобининг эълон қилиниши билан бошланган. Ю.Ҳарарига кўра, 1492 йили Хистофор Колумб томонидан Америка қитъасининг топилиши илмий инқилобни бошлаб берган: “Американинг кашф этилиши европаликларни реал кузатувларни ўтмиш анъаналаридан устун қўйишга ундади. Қитъани ўзлаштиришга бўлган иштиёқ эса улардан янги билимларни тезроқ ривожлантиришни талаб этарди” [11. Б. 194]. Албатта, бу қарашларнинг ҳар бирида муайян даражада ҳақиқат мавжуд, шу билан бирга уларнинг бирортаси мутлақ тўғри бўла олмаслиги ҳам айни ҳақиқат. Бизнингча, бу фактлар жаҳон тарихи саҳнасида кичик бир рамз вазифасини ўтайди, холос.
Ҳақиқат шундаки, илмий инқилоб ХV асрнинг сўнги ҳамда ХVII асрнинг бошларигача бўлган оралиқда содир бўлди ва замонавий илм-фан тарақиёти учун замин яратди. Илмий инқилоб бизга квантлар оламида “сайр қилиш”, Ойга учиш, компьютер билан суҳбатлашиш ва тана аъзоларимизни сунъийлаштириш имконини берди. Лекин шулар билан бирга, у инсониятга атом бомбасини ҳам “тортиқ” қилди. Энди инсоният нафақат дунёни ўзгартиришга, балки ундаги ҳаётни йўқ қилиб юборишга ҳам қодир экани аён бўлди.
Илм-фаннинг тараққий этиши бизнинг олам ва одам ҳақидаги тасаввурларимизни инқилобий тарзда кенгайтирди, айни дамда жуда кўплаб бир-бирини инкор қилувчи тармоқларга ажратиб ташлади. Бу ҳодисалар шахс ва жамият олдига янги мақсад ва вазифаларни қўйиш билан бирга, бизни жавобсиз саволлар гирдобида жарлик томон тортаётгани ҳам ҳақиқат. Зотан, тараққиёт тақдим этаётган глобал исиш, ядровий қуролланиш, ахборот хуружлари, терроризм, бир хил жинслилар никоҳи каби муаммолар инсониятнинг мавжудлик ҳақидаги ягона ғоя атрофида бирлаша олмаслиги, инсон концепциясининг турфа хиллиги оқибатидир.
Адабиётни даврлаштириш масаласида ҳам худди инсониятнинг маданий босқичлари каби уч давр эътиборга олинади. Етакчи адабиётшунослардан иборат муаллифлар гуруҳига кўра, “бадиий тафаккурнинг энг умумий ва барқарор учта: 1) архаик ёки мифопоэтик; 2) традиционалистик ёки норматив; 3) индивидуал-ижодий ёки тарихий типлари” [1. Б. 4] мавжуд.
Бадиий тафаккурнинг архаик (мифопоэтик) босқичи палеолит давридан бошлаб антик Юнонистонда милоддан аввалги VII–VI асрлар, Шарқда эса милодий I асргача давом этган.
Традиционализм (норматив поэтика) босқичи Европада милоддан аввалги VI–V асрлардан XVIII аср ўрталаригача, Шарқда эса милодий I асрдан ХIХ аср охири – ХХ аср бошларигача давом этиб, энг узоқ муддат – икки ярим минг йиллик даврни қамраб олади.
Индивидуал-ижодий босқич Европада ХVIII аср ўрталаридан, Шарқда ХIХ аср охири – ХХ аср аввалидан бошланиб, ҳозирга қадар давом этмоқда.
Биз юқорироқда санаб ўтган тарихий босқичлар ва бадиий тафаккур босқичларининг бу қадар уйғун келиши, албатта, тасодиф эмас.
Сабаби, адабиётшунослик муайян давр адабиётини ўрганар экан, аввало, шу давр ижтимоий-тарихий шароитини ҳисобга олади. Чунки “ҳар бир давр адабиётининг ривожланиш даражаси, ундаги турфа адабий ҳодисалар кўп жиҳатдан ижтимоий-тарихий шароит билан боғлиқ бўлади. Ижтимоий-тарихий шароит деганда жамиятнинг ижтимоий-иқтисодий, маданий ва маърифий ҳолати тушуниладики, булар бари бадиий адабиёт тараққиётининг ташқи омили (таъкид бизники – С.Қ.) саналади” [9.
Б. 418]. Шундай экан, инсон концепцияси бир вақтда ҳам адабий-фалсафий, ҳам ижтимоий категориядир. Қуйида бу хулосанинг нечоғлик тўғри эканини, тарихнинг муайян босқичидаги ижтимоий-тарихий шароит, шу даврга хос бадиий тафаккур ва инсон концепцияси масалаларини ўзаро уйғун, яхлит маданий ҳодиса сифатида кўриб чиқиш орқали баҳолашга ҳаракат қиламиз.
Бадиий тафаккурнинг мифопоэтик босқичга хос асосий хусусияти сифатида синкретиклик кўрсатилади. Синкретизм юнонча “фарқламаслик” сўзидан олинган бўлиб, бутун борлиқни яхлит тушуниш демакдир. Синкретизм – “инсон тафаккурининг ҳали бўлинмаган ҳолати” [4. Б. 6]. Яъни “табиат билан инсонни, сўз билан у англатган нарсани, “мен” билан “ўзга”ни, ҳаётий амал билан санъатни фарқламасдан қабул қиладиган, ҳали абстракт фикрлаш ва рефлексия (ўзини англаш)га қобил бўлмаган онгга хос тафаккур назарда тутилади” [9. Б. 425]. Архаик босқичда санъат ҳам бир бутун ҳодиса бўлган. Бу даврда санъатнинг турлари, умуман, уларни турларга ажратувчи чегара мавжуд эмасди. Шу маънода, санъатшунослар синкретизм истилоҳини санъатнинг қадимий, ҳали турларга хос специфик хусусиятлар бўй кўрсатмаган шаклига нисбатан ҳам қўллайдилар [3. Б. 312]. Қадимги одамларнинг диний ритуаллари синкретизмга ёрқин мисол бўла олади. Бундай ритуалларда одамлар бир вақтнинг ўзида қўшиқ куйлаши (табиатга мурожаат қилиб омонлик ёки яхши ўлжа сўраши), рақсга тушиши, ноғора чалиши ё саҳна элементларини кўрсатиши мумкин эди. Эътиборли жиҳати, ритуаллардаги санъат ҳодисаларининг бири иккинчисидан фарқланмаган. Бошқача айтганда, бу “санъат” шу ритуаллардагина мавжуд бўлган яхлит маросимнинг муҳим элементлари ҳисобланган.
Архаик босқичда “инсон тафаккурининг ҳали бўлинмаган”лиги, палеолит даврининг шарт-шароитлари билан бевосита боғлиқ.
Зеро юқорида ҳам қайд этганимиздек, бу даврда инсон онги серқирра ижтимоий муносабатлар асосида эмас, табиат ҳодисалари, табиий шарт-шароитлар таъсирида ривожланган. Шу омил туфайли инсон ўзини табиатнинг ажралмас бир қисми сифатида ҳис қила оларди, холос. Биз буни энг қадимги халқ оғзаки ижоди намуналари мисолида ҳам кўришимиз мумкин.
Йирик фольклоршунос Ольга Фрейденберг мифга “тафаккурнинг беихтиёр шакли” [12. Б.
119] дея таъриф беради. Дарҳақиқат, қадимги инсонлар мифларни қасддан яратмаганлар.
Мифлар одамларнинг кундалик ҳаётидаги урф-одатлари ва ритуаллари доирасида ўзўзидан, мавжуд удумларнинг баёни сифатида пайдо бўлган.
Ибтидоий одамлар учун миф оламни билишнинг асосий воситаси ҳисобланган. Шу маънода мифлар қадимги одамларнинг фикрлаш тарзи, дунёқараши ҳақида кенг маълумот бера олади. Инсон ўзини табиатнинг бир қисми сифатида тасаввур қилган кезларда атрофидаги нарсаларга ҳам ўзидаги сифатлардан келиб чиқиб баҳо берган. Шу сабабли у табиатдаги нарсаларга инсонга хос хусусиятларни кўчирган. Яъни қадимги одамнинг тасаввурича, атрофдаги нарсалар ҳам инсон каби фикрлайди, инсон каби ҳаёт кечиради. Мифнинг фетишизм, анимизм ва тотемизм каби турлари ҳам ана шу тасаввурларнинг маҳсулидир.
Традиционализм бадиий тафаккур тараққиётида нисбатан энг узоқ муддат, қарийб икки ярим минг йил ҳукм сурган босқичдир.
Мазкур босқичнинг бу қадар узоқ муддат давом этгани асрлар мобайнида ижтимоий шартшароитнинг деярли ўзгармагани, феодал тузимнинг барқарорлиги, мустаҳкам диний эътиқод, жамиятлараро коммуникациянинг сустлиги, илф-фан инқилобининг “кечиккани” каби қатор омиллар билан боғланади. Таъкидлаш зарурки, традиционализмнинг икки ярим минг йиллик умри дунё маданияти тарихидаги умумий ҳисоб бўлиб, у алоҳида олинган цивилизацияларда бу қадар узоқ яшамаган.
Ижтимоий шарт-шароитнинг ўзгариши, янги парадигма ва инсон концепциясининг шаклланишига қараб традиционализм Ғарбу Шарқда турли даврларда, турлича вақт чегараларида доминантлик қилган.
Мифопоэтик босқичда синкретизм муҳим аҳамият касб этган бўлса, традиционализмга келиб санъат турлари ўзидаги специфик жиҳатларни яққол кўрсата бошлади. Жумладан, адабиёт ҳам алоҳида соҳа сифатида шаклланди.
Традиционализмни фарқловчи энг муҳим жиҳат ижодий жараёнда анъанавийликнинг устун туришидир. Хусусан, Шарқ мумтоз адабиётида ижодкор мавзуни ёритишда имкон қадар ижтимоийликдан қочади, ифодада замон ва макон уйғунлигини таъминламайди, қолаверса, талқинда ўзига хосликка интилмайди. Яъни бу давр ижодкорлари ўзининг шахсий кечинмаларини, анъанадан кескин фарқ қилувчи фикр ва ғояларини илгари сурмаган. Профессор Д.Қуронов бу ҳақда шундай ёзади: “...гарчи мумтоз шеърда кўнгил изҳори асосан “мен” тилидан берилса-да, ҳақиқатда унинг ортида муайян бир шахс эмас, кўпроқ ўқувчига аввалдан таниш лирик субъектлардан бири – ошиқ, мутафаккир, носиҳ ё замонадан куйган жабрдийда намоён бўлаверади. Айни ҳол жамиятда шахс мақоми кучайган шароитга мувофиқ эмас” [10. Б. 192]. Худди шу омиллар Шарқ мумтоз адабиётида муаллиф шахсиятига ҳам парда тортади. Баъзан муаллиф ёзган асарига ўз имзосини ҳам қўймаган. Зеро, оламни фақат диний-ахлоқий мезонлар асосида тушунган инсон, табиий равишда, ҳаётини қатъий анъаналар асосига қурган. Бу давр эстетик қарашларининг бирламчи ҳақиқати сифатида дунёнинг фоний эканлиги айтилган, санъаткор учун чинакам гўзаллик эса олам ва одамнинг ботини ҳисобланган.
Мумтоз адабиётда эстетик тасаввурлар ахлоқдан ажратилмаган. Зеро, мумтоз мутафаккирлар наздида инсоннинг асл гўзаллиги маънавий гўзалликдир. Шу каби омиллар сабаб бу даврда инсоннинг реалистик тасвири бадиий қийматга эга эмасди. Яъни, мумтоз ижодкор қаҳрамонларни реал воқеликдаги хатти-ҳаракатлари воситасида эмас, балки мутлақ идеал тушунчалар орқали тасвирлайди. Қаҳрамонда энг гўзал исломий сифатлар (тақво, илм, одоб, адолат, маърифат ва б.) мавжудлигини таърифда айтилганининг ўзи етарли ҳисобланган (яъни, масалан, тақволи одам дейилишининг ўзида қиёфа ҳақидаги анъанавий тасаввур ҳам бор). Шу сабабли ҳам шоир қаҳрамондаги шундай сифатлар таърифига кўпроқ урғу беради: сифат қай даражада мукаммал ва оригинал таърифланса, шу даражада индивидуал қиёфа ҳосил бўлади. Натижада ердан бутунлай узилган, Шарқнинг идеал ғоя ва мақсадларига йўғрилган қаҳрамон яратилади. Шу ўринда ўрта асрлар фалсафасига рус адабиётшуноси Юрий Боревнинг: “...инсон – гуноҳкор банда, чўққиларни забт этишга йўналиш олган ва камолга етгач, дунё саодатига эришиш учун дунё неъматларидан воз кечган – муқаддас зот” дея берган таърифи Шарқ мумтоз адабиётидаги комил инсон концепциясига ҳам мос эканини қайд этмоқ зарур.
Юқорида таъкидлаганимиздек, бадиий тафаккурдаги традиционализм Шарқда Ғарбга нисбатан анча узоқ муддат давом этади. Хусусан, миллий адабиётимизда мумтоз адабиёт анъаналари ХХ аср бошларигача давом этгани маълум. Бу вақтга келиб маърифатчилик, сентиментализм, романтизм каби босқичлардан ўтиб келган Ғарб бадиий тафаккури реализм ва модернизм таъсирида сайқал топаётганди.
Бизда мазкур босқичларнинг анча кеч бошлангани, балки, қурама шаклда, бир вақтнинг ўзида намоён бўлгани ижтимоий шарт-шароит ва коммуникация билан боғлиқ. Зеро, Туркистонда XХ асрнинг бошларига келибгина анъанавий бадиий тафаккур қобиғидан чиқиш имконини берувчи ижтимоий шарт-шароит вужудга келди.
XX аср бошларида ижтимоий-маданий ҳаётимизда содир бўлган туб бурилишлар, хусусан, даврий нашрларнинг пайдо бўлиши, жадидлар ҳаракатининг юзага келиши, хорижий адабий оқимларнинг таъсири натижасида бирин-кетин реалистик асарлар дунё юзини кўра бошлади. Профессор Д.Қуронов ХХ аср аввалида бадиий тафаккурда кечган янгиланишнинг бош омилини шундай изоҳлайди:
“Ҳамма гап ХХ аср бошлари Туркистон жамиятида шахс мақомининг ўзгаргани, инсоннинг ижтимоийлашганида. Содда қилиб айтсак, Туркистон кишиси жамиятнинг аҳволи, бугуни ва эртаси, мавжуд ҳолнинг сабаби – хуллас, сиёсат ҳақида бош қотирадиган бўлди” [10. Б. 191].
Ҳақиқатан, ижтимоий ҳаётда содир бўлаётган кескин ўзгаришлар шу ижтимоийликнинг бир бўлаги – ижодкор шахсини четлаб ўтмади.
Энди ижодкорнинг инсон ҳақидаги, унинг оламдаги ўрни ва мақоми ҳақидаги тасаввурлари ўзгарди. Шунга мос равишда, адабиётда олам ва одам муносабатлари ҳақидаги бадиий концепция (инсон концепцияси) янгиланиши натижасида индивидуал-ижодий бадиий тафаккур босқичига ўтилди.
Индивидуал-ижодий бадиий тафаккур босқичининг асосий фарқловчи хусусияти реалистик ифодадир. Анъанавий қолиплар таъсиридан чиқа олган ижодкор оламни индивидуал тарзда бадиий мушоҳада қила бошлади. Ада-
Saʼdullo Quronov